Per istrada, falendu da Mursiglia è in cerca di u cimiteriu di i sumeri, aghju pigliatu a stradella chì longa u mare ind'un alpale à piccu è spiluncatu offrendu una vista panoramica nantu a parte occidentale di u Capicorsu.

D'un trattu si passa da u lume risplendente à u bughju di sottuboscu, una piccula furesta di lecce chì sorge tale un decoru secretu, a faccia piatta d'un paisaghju chì si spanna cume una figura archetippale.

Sò vultata in Capicorsu in cerca d'issa stradella, quella chì avvia à a furesta piatta, induve u tempu s'hè firmatu appesu.

Aghju ritrovu u mio caminu è ci aghju fattu un ritrattu, propiu à listessu locu chè induve era 5 anni fà.

Da custì, sò partita da l'idea di a maghjine dentru a maghjine, da u ricordu ind'u ritrattu è di e messe in abbissi.

Aghju ritrattatu pezzi di paisaghji senza orizonte, arburi torti è fragili, scoglii chì parianu vene da u neoliticu. Mudificandu e perspettive, creendu rumpiture è integrandu una maghjine ind'è a maghjine, aghju cercu à inversà i codici di e riprisentazioni classiche (un paisaghju panoramicu è urizontale).

Pruvucà e rumpiture di linee ind'è a maghjine, era dinù avvicina si da l'accidenti geologichi di u Capicorsu è da l'orograffia d'issu territoriu chì rinchjude tuttu u misteru di ciò chì ci scappa, u sottu sottu di ciò chè no ùn capimu.

Nantu a strada ricullendu da Cinturi, trinchendu à manca, prima di piglià a D80 affacca a chjesa di u Cunventu di Mursiglia, dettu cunventu di A Nunziata.

Entrendu ci si palesanu altari simplici è nudi assestati in un seguitu d'alcove. Quì u tempu s'hè stantaratu.

www.dunevarela.com